盧比迪古面臨被炒　阿根廷名帥或接掌西維爾

小哥阿四 · 發表於 2022-10-5 10:22:31

西維爾今季成績慘淡，踢咗7場西甲僅有1勝2和4負，加上2場歐聯都入唔到波，西班牙傳媒指教練盧比迪古好大機會短期內被炒，會方已經接觸阿根廷名帥森柏奧利接手領軍。

曾經執教西班牙國家隊及皇馬嘅盧比迪古，3年前開始擔任西維爾教練，並協助球隊奪得2020年歐霸盃冠軍，上季西甲獲得第4位。

不過，好景不常，西維爾今季表現走晒樣，踢7場聯賽只係贏過愛斯賓奴，搞到現時排尾四，隨時有降班危機。

西維爾喺歐聯表現一樣一無是處，包括主場以0比4輸畀曼城，作客打和哥本哈根0比0，如果周四(6日)凌晨歐聯主場贏唔到多蒙特，相信盧比迪古會立即執包袱，盛傳英超狼隊已經打算搵佢過檔。

至於西維爾亦接觸森柏奧利接手領軍，呢位光頭主帥曾經執教智利、阿根廷國家隊，同埋2016/17年球季教過西維爾，非常熟悉呢支西甲球隊，應該可以迅速上手。