阿根廷要求英超兵休戰　曼聯、熱刺肯唔肯？

小哥阿四 · 發表於 2022-10-1 10:22:03

今屆卡塔爾世界盃破天荒喺年底舉行，歐洲聯賽賽期被打斷，一眾國腳亦面對緊密賽程。據阿根廷傳媒報道，阿根廷足總近日正同多間英超球會接洽，希望喺世界盃開始前1個星期，畀旗下國腳避戰休息，受影響球會包括曼聯、熱刺、曼城、阿士東維拉同白禮頓等等。

阿根廷首場世盃分組賽，係11月22日對沙特阿拉伯，而英超暫停前最後一場賽事，就係11月14號富咸對曼聯，中間只係得1個星期左右時間。阿根廷著名記者Doble Amarilla報道，足總已經聯絡各支英超球會，要求佢哋喺最後1輪聯賽畀旗下國腳休息，以免喺決賽周開始前有乜「冬瓜豆腐」。

依家阿根廷國家隊入面，曼聯嘅利辛度馬天尼斯、熱刺嘅基斯甸羅美路、維拉門將達米安馬天尼斯都係正選主力，曼城前鋒祖利安艾華利斯、白禮頓中場阿歷斯麥亞里士打亦好大機會入選，不過英超賽事寸土必爭，曼聯、熱刺、曼城等更加要為爭標博命，阿根廷足總嘅如意算盤都幾難打得響。