【官宣】J神登陸希臘　同馬些路再合作

小哥阿四 · 發表於 2022-9-17 10:32:09

希臘名牌球隊奧林比亞高斯宣布，球會成功簽入哥倫比亞中場占士洛迪古斯，呢位31歲球星簽約至明年6月，喺奧林比亞高斯更會同昔日皇家馬德里隊友馬些路再度合作，極有睇頭。

「J神」上星期同卡塔爾球會艾雷恩達成解繼協議，今次可以以自由身加盟，奧林比亞高斯周四(15日)官方聲明表示：「佢嚟啦！歡迎占士洛迪古斯加盟！」奧林比亞高斯早前亦簽入皇馬名將馬些路、馬德里體育會嘅維沙積高，以及借用森林前鋒黃義助。

奧林比亞高斯個班主馬連拿基斯，同時亦係英超諾定咸森林班主，森林今個夏天簽入超過20個球員破晒紀錄，奧林比亞高斯亦都唔輸蝕，占士洛迪古斯係球隊今季第15個新球員。