夏蘭特豪言稱霸歐洲　證實歐聯主題曲做鬧鐘

小哥阿四 · 發表於 2022-9-14 10:46:32

曼城周四(15日)凌晨歐聯迎戰多蒙特，挪威前鋒艾寧夏蘭特今夏轉會後，立即有機會倒戈「蜜蜂兵團」，佢賽前表示去曼城嘅最大目標係稱霸歐洲，更證實坊間傳聞話佢用歐聯主題曲做手機鬧鐘係真有其事！

艾寧夏蘭特加盟曼城後迅速適應，7場賽事狂入12球，佢喺倒戈多蒙特前表示：「我想進步、我想勝利同埋贏取錦標，我真係好鍾意歐聯呢項賽事，所有人都知道贏歐聯係我畢生夢想。哥迪奧拿同我一樣都係足球怪胎，我哋個腦只係得足球，呢個係我咁鍾意佢嘅原因。」

一直有傳艾寧夏蘭特用歐聯主題曲做手機鬧鐘，呢位射手表示：「我每朝早都係聽住歐聯主題曲起身，呢個係我最愛嘅賽事，呢件事(主題曲鬧鐘)係真嘅！」艾寧夏蘭特目前為薩爾斯堡、多蒙特同曼城踢過20場歐聯，合共有25個入波，場均入超過1球，果然係佢「最愛賽事」。