西維爾大崩潰　普捷天奴有望接手

小哥阿四 · 發表於 2022-9-8 10:13:57

西維爾喺歐聯以0比4大敗於曼城腳下之後，今季5場正式賽事僅1和4負，西班牙傳媒指教練盧比迪古好可能被炒，並會聘請前巴黎聖日耳門主帥普捷天奴接手領軍。

西維爾今季人腳出現唔少變動，包括攻守主力奧甘波斯、祖利斯古迪離隊，但只簽入艾斯高、阿歷士迪尼斯等「次貨」，實力自然打折扣，今季西甲4戰僅1和3負，加上今場歐聯大敗，會方隨時會換帥「止血」。

西班牙傳媒甚至指西維爾管理層已經聯絡普捷天奴，準備隨時搵佢執教。普捷天奴球員時代曾效力愛斯賓奴多年，掛靴之後亦執教過呢支西甲球隊，對於西甲並唔陌生，加上現時冇教職，的確係接掌西維爾帥印嘅好人選。