C朗未絕望　短期內仲有機會跳槽

小哥阿四 · 發表於 2022-9-3 10:11:10

英超、意甲、西甲、德甲、法甲等歐洲主要聯賽轉會市場已經關閉，由6月一直傳好可能離開曼聯嘅C朗，最終都冇動靜，但唔代表呢位葡萄牙巨星短期內唔會走人，因為葡超、比甲轉會市場仲未結束，特別係葡超要等到9月22日先至「收市」，C朗隨時有可能重返母會士砵亭。

比利時聯賽轉會市場將於9月6日關閉，但估計C朗轉戰比甲機會非常低，去葡超機會明顯大好多，一來葡萄牙係佢祖國，二來士砵亭真係有興趣邀請佢回巢，同埋士砵亭有份踢今屆歐聯，對C朗有好大吸引力，問題係球會難以負擔C朗巨額薪酬，除非佢肯減人工。

另外，近年有唔少老將去土超搵食，土耳其聯賽轉會市場將於9月8日關閉，都係C朗可以考慮嘅地方之一。