車仔買李城中堅達成協議　將簽約6年

小哥阿四 · 發表於 2022-8-27 20:52:13

車路士收購李斯特城中堅韋斯利科芬拿，取得突破性發展，歐洲各大傳媒報道，指李斯特城已經接受車仔開出嘅報價，以7,000萬鎊固定轉會費，再加浮動轉會費，將呢位21歲法國新星出售畀車路士，韋斯利科芬拿只要通過體測，就會同車仔簽約6年。

車路士早前3次報價都被李斯特城拒絕，包括日前提出嘅7,000萬鎊轉會費，李城一度企硬要求8,500萬鎊。不過，兩間球會之後作出讓步，車仔願意增加一筆浮動轉會費，令李城態度軟化。

事實上，因為今次轉會事件，韋斯利科芬拿近期已被李斯特城下放去U23隊操練，雙方關係惡化，李城自知難以留住呢位中堅，最終接受車路士開出嘅條件。