去年今日 27-8-2021

mingliedy · 發表於 2022-8-27 16:34:18

圖中兩位一年來的遭遇，不勝唏噓

2021年8月27日曼聯正式宣布C朗回巢，到咗今日剛好一周年，呢位葡萄牙國腳曾滿腔熱誠，要協助紅魔鬼重振雄風，但一年過去，C朗卻掀起鬧離隊風波，睇番轉頭，實在好諷刺。

C朗上年夏天幾乎由祖雲達斯轉投曼城，但最後關頭，費格遜介入將呢位愛徒帶番奧脫福，C朗回歸首仗對紐卡素，就個人梅開二度，以為展開夢幻之旅，點知係噩夢嘅開始。

雖然C朗上季為曼聯上陣38次入24球，但僅獲得英超第6位，無緣今屆歐聯，亦成為佢今夏要求離隊嘅主因。最估唔到係竟然冇大球會肯簽入C朗，一代球王淪為籮底橙，實在可悲。

C朗脫「魔」不成，更因為缺陣季前大部份集訓，導致開季後狀態不足，首3場英超有2場做後備，已經成為「雞肋」，相信唔會得到曼聯新帥坦哈格重用。

如果C朗未能於9月1日轉會窗關閉前離隊，恐怕今季好難捱，唔知C朗有冇後悔一年前拒絕曼城邀請，重返曼聯呢？