碧基搭路！西乙球隊力斟曼聯新星

小哥阿四 · 發表於 2022-8-26 20:19:59

西班牙球星碧基喺巴塞隆拿開始淡出，不過佢唔憂冇嘢撈，本身擁有西乙球會FC安道爾嘅佢，正為呢支今季升上西乙嘅神奇球隊積極組軍，最新目標係曼聯中場新星麥比利，有望以借用身份加盟。

碧基喺2018年收購加泰羅尼亞球隊FC安道爾，短時間內將該業餘球會帶上西乙，而且利用自己人脈為球隊招兵，FC安道爾教練係前巴塞隆拿助教艾達沙拉比亞，今夏亦簽入前巴塞隆拿B隊中場奧利拉拿，野心勃勃。

據西班牙《阿斯報》報道，碧基準備為球隊作出重磅增兵，目標直指曼聯19歲中場麥比利，呢位新星已代表突尼西亞國家隊上陣19次，上季亦曾2次為曼聯喺英超上陣，報道指FC安道爾打算借用一季，如果球隊可以升上西甲，更有權用2,500萬歐元將佢買斷。