法蘭基迪莊練波受辱

小哥阿四 · 發表於 2022-8-12 10:15:26

巴塞隆拿同法蘭基迪莊嘅薪酬風波愈搞愈僵，一直企硬唔收到欠薪唔轉會嘅法蘭基迪莊，周三(10日)去訓練期間被球迷羞辱，數名球迷對住呢位荷蘭中場大叫：「減薪啦，人渣！」影片曝光後引起唔少爭議，網民都認為巴塞隆拿球迷行為太過份。

西班牙《每日體育報》影到，法蘭基迪莊揸車駛入訓練場期間，數名等候嘅球迷大叫「減薪啦，人渣！」法蘭基迪莊當然冇理會直接入去訓練場，但片段就引起爭議，網民表示法蘭基迪莊只係捍衛自己應有嘅權益，巴塞搞唔掂盤數唔應該遷怒球員。

巴塞隆拿一直未能為幾為新加盟球員註冊，賣唔走法蘭基迪莊係主要原因之一，雖然巴塞之前已經接納曼聯同車路士開價，但法蘭基迪莊就堅持要收番巴塞承諾畀佢嘅2,000萬歐元人工先肯走，日前有消息指巴塞更打算採取法律行動，指法蘭基迪莊同前任會長所簽嘅合約係違法。