馬高斯阿朗素落「車」　又係去巴塞

小哥阿四 · 發表於 2022-8-7 10:45:35

車路士宣布收購白禮頓左後衞古古列拿之後，陣中另1位左閘馬高斯阿朗素準備離隊，英國《每日郵報》指呢位31歲西班牙國腳已經同球會訓練基地職員逐一告別，預料短期內轉投巴塞隆拿。

馬高斯阿朗素效力車路士6年，上陣超過200場，協助球隊奪得英超、英足盃、歐聯、歐霸盃、世冠盃。呢位左閘助攻力強，上季射入5球。不過，車仔以6,200萬鎊簽入古古列拿後，預料馬高斯阿朗素將失去正選，離隊可以更有利事業發展。

據悉，馬高斯阿朗素已經同意巴塞開出嘅待遇條件，雙方將會簽約2年。西班牙傳媒更指馬高斯阿朗素要求車仔主帥杜曹唔好派佢踢周日(7日)凌晨英超對愛華頓，以免受傷影響轉會。