夏蘭特向舒利亞「偷師」　英超首戰必入波？

小哥阿四 · 發表於 2022-8-6 10:14:25

曼城新簽射手艾寧夏蘭特被寄予厚望，但上仗社區盾門前失機，表現令人跌眼鏡，呢位22歲挪威國腳並冇氣餒，日前同英格蘭傳奇射手舒利亞見面，表示喺對方身上偷師，獲贈英超入波秘訣，好有信心可以喺周日(7日)晚首輪英超作客射入韋斯咸大門。

舒利亞以260球成為英超史上入波最多嘅球員，艾寧夏蘭特喺呢位名宿面前，變身小球迷，同對方合照「集郵」，並放上社交網話：「從佢身上獲得小貼士。」

艾寧夏蘭特之前效力多蒙特上陣89場入86球，入球率極高，但佢認為英超唔易踢：「球員好似表演者，每星期喺球場上演出，身為前鋒必須入波，但好多事情並非可以控制，我會嘗試去享受，付出百份百努力，贏出每場比賽，我係1位非常渴望入波嘅球員。」

艾寧夏蘭特仲話選擇離開多蒙特，係希望跳出「舒適區」，接受更大挑戰，自己仍然年輕，可以效力曼城呢種大球會，一定可以令自己更加進步。至於艾寧夏蘭特能否踢第1場英超就入波，大家拭目以待。