A米豪買伊巴接班人　佢曾射爆意大利

小哥阿四 · 發表於 2022-8-5 10:24:19

上季意甲冠軍AC米蘭宣布重大收購，以3,600萬歐元轉會費簽入布魯日21歲新星基迪拿尼，呢位身高1米92嘅比利時國腳技術全面，可勝任進攻中場及前鋒，被睇好可以做伊巴謙莫域接班人，成為A米鋒線新旗幟。

基迪拿尼近年迅速冒起，過去2季都係布魯日主力，上季更做出「雙雙」數據，為呢支比甲勁旅上陣49場，射入18球及10次助攻，表現令人驚喜，一向「理財謹慎」嘅AC米蘭都不惜豪花3,600萬歐元收購佢，基迪拿尼將會着AC米蘭90號球衣。

由於伊巴謙莫域因傷長抖，加上另1位前鋒基奧特已經35歲，難以每場都踢足，相信基迪拿尼新一季將有大把表演機會。

值得一提，基迪拿尼曾為比利時國家隊上陣8場入1球，唯一入球就係上年10月歐國聯季軍戰，後備上陣射入意大利大門，但比利時該仗輸1比2。