張伯倫傷勢嚴重有排抖　紅軍生涯或玩完

小哥阿四 · 發表於 2022-7-31 11:21:30

利物浦中場阿歷士張伯倫早前熱身賽對水晶宮，勇戰受傷，唔止肯定缺陣周日(31日)凌晨社區盾對曼城，而且仲需要休息一段長時間，由於呢位28歲英格蘭國腳只剩下1年合約，預料即使佢之後復出，亦難以獲得續約。

利物浦對曼城前夕，紅軍領隊高普透露阿歷士張伯倫嘅傷勢：「阿歷士有嚴重筋腱傷患問題，需要缺陣一段時間，但並唔需要做手術，我哋有唔少球員都試過呢個位置受傷，實在係一種令人討厭嘅傷患。」

阿歷士張伯倫近年長居後備，早已經傳出今夏可能離隊，包括韋斯咸有興趣簽佢。不過，阿歷士張伯倫今次受傷之後，恐怕會嚇退潛在買家，好大機會等明夏自由身走人。