摩連奴親自聯絡 力斟韋拿杜姆

小哥阿四

羅馬教練摩連奴變身「精明眼」，今夏專門搶簽平、靚、正球員，繼日前簽入自由身射手保羅戴巴拿之後，依家又力斟巴黎聖日耳門(PSG)中場韋拿杜姆，希望借用呢位31歲荷蘭國腳，如果成事又可以慳一筆轉會費。

據悉摩連奴親自打電話聯絡韋拿杜姆，邀請佢加盟羅馬，保證佢可以成為主力。韋拿杜姆上年夏天以自由身由利物浦轉投PSG之後，未能穩坐正選，令佢感到意興闌珊，已多次傳出可能離隊，依家「寸王」盛意拳拳想簽韋拿杜姆，相信佢會心動。

事實上，PSG早前改由加迪亞執教後，亦無意留用韋拿杜姆，唔介意將佢外借畀羅馬。不過，韋拿杜姆年薪高達900萬歐元，羅馬難以負擔，會方尋求同PSG各自負擔韋拿杜姆一半人工，如果可以解決薪酬問題，相信韋拿杜姆就可以轉戰意甲。

mingliedy

要努力

LasCases

又入平貨。