曼城3新兵首演 壽星仔夏蘭特坐足全場

小哥阿四

喺美國集訓嘅英超冠軍曼城，星期四(21日)朝早進行夏季首場熱身賽，2比1擊敗CF阿美利加，3位新球員加雲菲臘斯、史堤芬奧迪加同祖利安艾華利斯都首次亮相，但係萬眾期待嘅艾寧夏蘭特竟然坐足全場，令球迷擔心佢係咪受傷，不過呢位「壽星公」就派定心丸，證實下場對拜仁慕尼黑就會上陣。

曼城今夏首場熱身賽強陣出擊，不過箭頭唔係艾寧夏蘭特，而係阿根廷新星祖利安艾華利斯，配合貝拿度施華、基亞利殊等球星表現突出，王牌球員奇雲迪布尼更轟入2球靚波，協助「藍月亮」旗開得勝。下半場英格蘭國腳加雲菲臘斯處子上陣，但艾寧夏蘭特就全場坐喺後備席。

21號係艾寧夏蘭特22歲生日，唔少球迷估計佢係受到傷患困擾而冇份落場，佢賽後喺社交網答謝球迷生日祝福留言：「多謝晒！對拜仁慕尼黑首演！」曼城星期日(24日)朝早會同拜仁慕尼黑踢熱身賽，艾寧夏蘭特將會力爭喺「老對手」身上開齋。

LasCases

慢慢操起

Winston91

回復 小哥阿四 ##1 的帖子

下場對拜仁，夏蘭特面對老對手，要睇佢點表現

howardwo

期待下場球賽