孫興民變「茅柴」　打到對手「嘔血」

小哥阿四 · 發表於 2022-7-18 10:26:18

周六(16日)晚喺南韓舉行嘅季前熱身賽，熱刺同西維爾打和1比1，熱刺射手孫興民喺自己地頭，有恃無恐變身「茅柴」，批肘打到對手蒙迪爾爆嘴流血，似足「嘔血」，場面非常恐怖。

呢一幕血腥場面發生喺上半場尾段，西維爾後衞蒙迪爾從後搶截孫興民，點知食咗對手一肘，即時血流如注，需要離場治理，以及更換染有血跡嘅球衣。

據悉上半場結束之後，蒙迪爾搵孫興民理論，幸好雙方球員立即上前勸交，先至冇釀成更大衝突。

蒙迪爾下半場並冇上陣，換邊後僅5分鐘，孫興民傳畀哈利卡尼射入，為熱刺打開紀錄，西維爾由拿傑迪錫遠射入網扳平1比1。熱刺完成亞洲之旅，下場熱身賽將作客格拉斯哥流浪。