隊友6碼失機　羅美路神反應超爆笑

小哥阿四 · 發表於 2022-7-15 13:06:16

熱刺周三(13日)喺南韓嘅熱身賽6比3大炒韓職明星隊，「人氣王」孫興民入2球當然受到注目，不過佢嘅隊友艾馬遜同基斯甸羅美路亦廣受談論，事關艾馬遜早段曾經6碼失機，羅美路真情流露嘅反應就勁爆笑，片段迅即喺網上瘋傳。

呢一幕發生喺比賽第14分鐘，當時比數仲係0比0，右翼衞艾馬遜殺到龍門口，離門6碼面對空門竟然射喺柱邊出界，而鏡頭影到羅美路見到後，即時失望揚手掉頭走，並顯露出非常不屑嘅表情，真情流露畫面令球迷非常同情。

唔少熱刺球迷都留言話明白羅美路感受：「羅美路，我懂你」、「如果夏天唔賣艾馬遜，我唔會收貨」。據報熱刺正斟介米杜士堡右閘迪積史賓斯，價值1,500萬鎊嘅轉會接近完成，艾馬遜嘅正選位置岌岌可危。