巴塞隆拿宣布2023年暫別魯營球場

小哥阿四 · 發表於 2022-6-23 10:26:55

西甲班霸巴塞隆拿宣布，為配合全面翻新魯營球場嘅工程，球隊喺2023/24球季將唔能夠使用魯營作為主場，改為借用喺1992年舉辦過夏季奧運嘅奧林匹克體育場作為主場，據報更換主場計劃要耗支2,000萬歐元。

巴塞隆拿聲明指出，23/24球季更換主場計劃已獲巴塞隆拿市議會批准，但球場內設施如記者室、更衣室、室內停車場等都需要翻新，預計將花費1,500萬歐元至2,000萬歐元，而呢個曾經係愛斯賓奴主場嘅球場，座位只有55,000個。

雖然今次更換主場花費極大，不過當魯營球場翻新後就可以慢慢賺番，新魯營球場將獲贊助冠名為「Spotify魯營」，除咗會加裝天花之外，座位亦由原本99,354個增加至105,000個，預計2024年會先以一半入座率方式重開。