基沙文陷21場入球荒　國家隊前途亮紅燈

小哥阿四 · 發表於 2022-6-10 10:25:17

法國上仗歐國聯對克羅地亞，原本可以贏波，但基沙文浪費多次入波黃金機會，包括面對空門射斜，呢位31歲前鋒已連續21場比賽食白果，隨時可能被領隊迪甘斯棄用，冇得踢今屆世界盃決賽周。

基沙文上仗多次起腳，但射門唔係軟而無力，就係角度太正，最離譜一次係88分鐘，克羅地亞防線犯錯，基沙文單刀，過埋出迎嘅門將利華高域，殺到禁區左路起腳，卻唔中目標，令法國錯失絕殺對手好機會。

翻查紀錄，基沙文對上1次入波，已經係1月初西班牙盃協助馬體會以5比0大勝丙組仔馬達亞洪達，其後各項賽事長達21場冇波入，包括4場國際賽食白果。
輿論開始質疑基沙文是否仍有能力佔據國家隊位置，特別係基奧特、奧士文尼迪比利今次都冇入選，如果基沙文再冇表現，隨時被呢2人取代。