自我減壓　夏蘭特拒絕回應有關曼城問題

小哥阿四 · 發表於 2022-6-2 10:29:42

周五(3日)凌晨將會上演多場歐國聯賽事，塞爾維亞主場對挪威備受關注，因為挪威神鋒艾寧夏蘭特早前落實由多蒙特轉投曼城，賽前自然成為傳媒追訪對象，但呢位21歲前鋒拒絕回應有關曼城問題，以免增加壓力。

艾寧夏蘭特出席賽前記者會時，被問到點睇自己喺曼城嘅前途時，佢立即「耍太極」：「近幾個月唔易過，好多事情非常複雜，效力多蒙特2年半以來，我都全力以赴，為球隊做到最好，我依家只想為國家隊踢好未來4場歐國聯賽事。」

挪威領隊蘇巴簡見艾寧夏蘭特唔想回答關於曼城嘅問題，亦幫佢解圍，話曼城仲未舉行記招介紹夏蘭特加盟，暫時唔會回應關於「藍月亮」問題。

不過，曼城主席阿姆巴拉克就隔空大讚艾寧夏蘭特係球會史上「最佳9號」，屬於獨一無二射手，好開心佢揀咗加盟曼城。

艾寧夏蘭特近年不時受傷，相信曼城上下都希望佢喺歐國聯小心踢，以免又受傷影響備戰下季英超。