莫迪歷堅稱續約皇馬：我唔係麥巴比！

小哥阿四 · 發表於 2022-5-27 14:23:55

皇家馬德里今季成績突出，克羅地亞中場莫迪歷係核心人物，呢位36歲球星寶刀未老，今季上陣超過40場，包括12場歐聯賽事全部踢足。即將回復自由身嘅莫迪歷雖然仍未續約，但佢決賽前重申決心留隊，講明：我唔係麥巴比！

基利安麥巴比過去1年不斷被傳會加盟皇馬，但最後關頭突然「轉軚」續約巴黎聖日耳門，莫迪歷被問到續約問題，就借麥巴比事件嚟講笑：「我仲未續約，但我肯定唔會係麥巴比，希望皇馬都唔會好似佢咁(突然轉軚)。我同皇馬關係好好，我一直都話要喺皇馬踢到掛靴。」

對於麥巴比事件會唔會影響皇馬備戰歐聯決賽，莫迪歷就話：「完全冇影響！因為球員根本乜嘢都唔知，亦冇任何期望，過去1年不斷有傳聞，但球員係唔會知道係真定假，所以最好都係停止呢個話題，歐聯決賽先係皇馬最重要嘅事，皇馬永遠都係歐洲頂尖，凌駕任何球員。」