過檔曼聯跟坦哈格？貝雲積：有可能！

joemalee · 發表於 2022-5-4 11:08:24

荷蘭國腳翼鋒貝雲積喺熱刺未受重用，長坐冷板嘅佢日前接受荷蘭媒體《AD》專訪，承認自己喺熱刺時日無多，而講到未來去向嗰陣，呢位24歲球星表示樂意過檔曼聯，跟荷蘭教頭坦哈格搵食，形容轉會「紅魔鬼」係有可能。

貝雲積今季英超只踢過4場正選，1月對李斯特城曾補時連入2球神奇反勝，佢喺訪問入面表示：「我以為對李斯特城場波後，我會有更多上陣時間，但事實並唔係咁。老實講我知道自己冇可能做到熱刺正選，原因好複雜，去阿積士係一個選擇、返荷甲係一個選擇，尤其世界盃就快展開。」

來季將會執教曼聯嘅坦哈格，執教阿積士期間對貝雲積瞭如指掌，今年1月阿積士亦曾2度提出收購貝雲積，但傾唔掂轉會費而拉倒，據聞坦哈格仍想將呢位前燕豪芬球星帶去曼聯，貝雲積就回應：「我暫時未同坦哈格傾過，但邊個會知將來發生咩事？或者轉會曼聯真係有可能。」