傳PSG日內炒普捷天奴　干地有意接手

joemalee · 發表於 2022-4-26 12:05:06

巴黎聖日耳門(PSG)啱啱重奪法甲冠軍，不過教練普捷天奴就帥位不保，據法國《巴黎人報》報道，PSG喺奪冠後立即決定「做嘢」，依家正同普捷天奴以及佢嘅教練團商討炒魷賠償，日內就會正式公布，消息指熱刺領隊干地已表明有意接手。

普捷天奴喺捧盃後，講明希望履行埋最後1年合約，但PSG就另有計劃，就喺捧盃24小時後即叫普捷天奴傾炒魷賠償，據報炒晒普捷天奴團隊嘅金額達1,500萬歐元。至於總監李安納度嘅去留暫時未有定案，傳聞PSG想搵雲格取代呢位巴西名將嘅位置。

新帥人選方面，報道指熱刺領隊干地有意接掌PSG，並會同意簽處2年合約，不過PSG目前首選仍然係施丹。干地今季季中先加盟熱刺，早前喺球隊陷入低潮嗰陣，曾多次批評球隊「唔夠班」同前列競爭，如果熱刺最後拎唔到歐聯參賽資格，轉教PSG亦不失為「升呢」選擇。