曼聯點只輸波　仲創下一項41年恥辱

joemalee · 發表於 2022-4-25 11:16:49

曼聯上仗1比3不敵阿仙奴，遭遇英超作客4連敗，創下球隊近41年最長聯賽作客連敗紀錄，而之前15次作客倫敦不敗走勢，亦告終止，真係一鋪清袋。

曼聯對上1次聯賽作客4連敗已經係1981年，當年最後作客連輸6場先至止血，自此之後，未再試過聯賽作客4連敗，估唔到相隔41年再出現呢個羞恥紀錄。

曼聯今季英超仲有2場作客，分別對白禮頓同水晶宮，照計冇理由再輸。另外，曼聯之前15次作客倫敦取得11勝4和，今場終於斷纜。

值得一提，阿仙奴中場格列沙加今場遠射入網，呢位瑞士國腳曾經3次喺英超禁區外射入紅魔鬼大門，同謝拉特，費迪南、菲臘斯並列英超禁區外射入曼聯大門最多次嘅球員。