坦哈格「用人唯親」　想簽法蘭基迪莊

joemalee · 發表於 2022-4-25 11:13:51

坦哈格落實成為曼聯下季領隊之後，據悉今夏有1.2億鎊資金為紅魔鬼增兵，西班牙《每日體育報》指呢位荷蘭名帥打算簽入巴塞隆拿中場法蘭基迪莊，事關2人曾於阿積士合作，坦哈格相信法蘭基迪莊成「魔」，有利執行佢嘅戰術部署。

即將25歲嘅法蘭基迪莊2019年由阿積士轉投巴塞隆拿後，雖然一直屬於正選，但球隊今季中途由沙維接手執教後，呢位荷蘭國腳表現唔穩定，加上巴塞今夏好大機會簽入AC米蘭中場基斯爾，勢必令法蘭基迪莊正選位置受動搖，如果「恩師」坦哈格邀請佢加盟，佢可能會答應。

事實上，坦哈格曾經批評巴塞隆拿唔識用法蘭基迪莊，可見佢認為呢位愛將嘅水平仲可以再提升。由於保羅普巴、尼曼查馬迪將於今夏離開曼聯，坦哈格收購法蘭基迪莊，正好將佢打造成球隊中場大腦。

估計法蘭基迪莊身價達7,500萬歐元，巴塞現時中場人腳充裕，的確有可能放人，若然成事更加可以改善財政狀況，屬於雙贏局面。