賴斯第3次拒絕續約　曼聯車仔機會來了

joemalee · 發表於 2022-4-24 10:45:15

英國《每日郵報》爆料，指韋斯咸中場迪格蘭賴斯第3次拒絕會方開出嘅續約條件，意味好大機會申請今夏離隊，曼聯同車路士都有意簽入呢位23歲英格蘭國腳。

迪格蘭賴斯近年表現出色，成為英超最炙手可熱嘅防守中場之一，所以就算佢仲有2年合約在身，韋斯咸都希望盡快同呢位猛將續長約。

不過，迪格蘭賴斯有意轉投大球會，希望一嘗捧盃滋味，對於會方開出嘅新合約無動於衷，據悉已經3次拒絕續約要求，引來曼聯同車路士等勁旅注意。

韋斯咸當然唔會輕意放走迪格蘭賴斯，據報將佢標價為1.5億鎊轉會費，由於車路士班主阿布拉莫域被英國政府制裁，球會唔可以收購新球員，曼聯成為潛在最大買家。