打比郡落實降班　朗尼表明想留隊協助重建

joemalee · 發表於 2022-4-20 10:08:49

因財務違規被扣21分嘅英冠球隊打比郡，周一（18日）作客1球不敵昆士柏流浪，喺尾４雷丁同日和波拎到1分後，正式宣布護級失敗，來季需要跌落英甲。不過前曼聯名宿兼領隊朗尼，賽後就表示為球員感到自豪，並表明希望下季繼續留隊幫手重建。

打比郡今季表現其實唔差，目前已經拎到52分，理應可以排喺中下游位置，可惜因為財政問題慘被扣分，最終導致降班收場，領隊朗尼賽後態度亦顯得相當正面：「當然會失望、悲傷、沮喪，但同時亦為球員感到自豪。無錯係一種奇怪嘅感覺，但我從未見過一支球隊降班後，球迷會有咁好嘅反應，多謝佢哋堅定不移咁支持，我認為太不可思議。」

球隊雖然下季即將跌落英甲，但36歲嘅朗尼似乎並無離心，反而向傳媒透露希望繼續留隊：「只要有老闆收購，我願意幫手重建球隊，為球迷再次帶嚟以往光輝嘅日子，我對留喺打比郡感到驕傲。」[/size=4]