|
|
《金宵大廈》最新單元《訪客》中，飾演住劏房單親媽媽嘅趙頌茹(Yu），要做私影MODEL謀生養育個仔，點知慘遭包租公性侵。監製表示，係時任TVB副總經理嘅杜之克提議搵阿Yu，因為之前睇過佢拍戲表現唔錯。
39歲嘅趙頌茹參加model比賽入行，但被唱片公司相中而簽約做歌手，因為貌似鄭秀文而成為話題，甚至連電影《無間道II》都搵Yu演年青版鄭秀文。阿Yu出道3年後就淡出，轉做時裝記者，亦試過做形象顧問。
趙頌茹最為人記得嘅應該係同周永恆嘅一段情史。阿Yu同周永恆因為拍劇集《青出於藍》而撻著，拍拖多年後喺2010年奉子成婚。曾經反叛嘅周永恆因為信仰而有改變，但係到2014年，周永恆被爆同模特兒公司助手兼拍檔嘅港視小花劉依靜（Ruby）有婚外情，周永恆同Yu因此發生爭執，Yu被周永恒推跌令面部受傷，Yu報警處理。周永恆被控傷人罪，判守行為18個月。唔夠一個月，周永恆去到Yu外家要求見兩個女，被Yu父母拒絕之後爆粗兼吐口水，周永恆再次被捕，今次被判監2個月緩刑18個月。
周永恆喺出軌事件後接受訪問，聲淚俱下咁讀出公開悔過書，自稱人渣兼鬧自己「賤格，鹹濕同貪玩」，但係同Yu都係離婚收場。本來周永恆答應俾贍養費Yu同兩個女，但係2個月後冇再俾錢，Yu戶口得返幾萬蚊仲要湊住2個女，要出山賺錢養家，做過凍肉公司文員，又復出做model同出活動搵錢。
趙頌茹參與過ViuTV《一切從失婚開始》節目，提及當年婚姻關係低潮時，曾經好驚見到前夫，又要擔心對方好多嘢，後來正式離婚令Yu鬆一口氣。
舊年Yu喺ViuTV Chill Club節目演唱當年作品《大孩子》，水準甚至比出道時更好，而家連演戲都有進步，重返幕前應該大把觀眾捧場。
|
|
在線雷達
發表於 2022-4-19 15:10:10
廣播
置頂
超級提昇
強效提昇
推舊帖
收嗲鳥
油顏色
