擺明轉會？羅拔嫂宣布：我學緊西班牙文

joemalee · 發表於 2022-4-17 10:06:38

拜仁慕尼黑前鋒羅拔利雲度夫斯基，近期熱傳將喺夏天轉投巴塞隆拿，就喺呢個風頭火勢之際，羅拔利雲度夫斯基老婆安娜就「火上加油」，周五(15日)突然喺IG宣布開始學習西班牙文！「羅拔嫂」選擇喺呢個時間講呢啲嘢，乜意思大家心知肚明。

作為營養師嘅安娜一直係羅拔利雲度夫斯基最後後盾，佢周五喺IG留言：「大家好，我已經開始學西班牙文，有乜貼士畀我呢？話畀我知。」安娜之後再用西班牙文同球迷打招呼，而背景係喺西班牙嘅馬略卡島，繼續大玩暗示遊戲。

西班牙傳媒爆料，羅拔利雲度夫斯基經理人薩哈維已同巴塞隆拿接洽，呢位波蘭前鋒亦決心去巴塞隆拿效力，不過拜仁慕尼黑就表明無意放人，「羅拔仔」同拜仁仲有1年合約，但續約談判遲遲未有進展。