富咸最快今晚升英超　即簽以色列猛將

joemalee · 發表於 2022-4-16 10:30:59

英冠「1哥」富咸喺積分榜遙遙領先，如果排第4位嘅諾定咸森林周五(15日)輸畀盧頓，而富咸喺周六(16日)凌晨贏打比郡，就可以提前鎖定英超席位。富咸亦火速為升班做準備，據報已簽入以色列國腳沙洛文。

因「俄烏戰事」爆發而逃離烏克蘭嘅以色列國腳沙洛文，據報已簽約富咸5年；22歲嘅沙洛文2019年開始效力薩克達，並且成為以色列史上最年輕歐聯入球者，踢翼鋒嘅佢有超強扭波技術，但自「俄烏戰事」爆發，佢同大部份喺烏克蘭踢波嘅球員都逃離戰火，而沙洛文就喺經理人薩哈維協助下，迅速搵到新東家。

報道指富咸會向薩克達支付630萬鎊轉會費，並且同沙洛文簽約至2027年，佢將會取代今夏轉投利物浦嘅法比奧卡華路。