金宵大廈2｜樊亦敏拍攝時因病體重達人生高峰減30磅即將回歸《愛·回家》

GIRLAV · 發表於 2022-4-14 13:42:33

無綫劇集《金宵大廈2》單元《姐姐》由樊亦敏、黃子雄及黃婉華主演，吳氏夫婦（樊亦敏及黃子雄飾）因女兒Lulu交通意外過身而聘請工人姐姐Louisa（黃婉華飾），並將佢改造成Lulu，演出令人感到心寒。除咗新面孔黃婉華引起討論，樊亦敏亦一改《愛·回家之開心速遞》三太搞笑形象，備受讚賞；而其實佢拍攝《金宵大廈2》嗰陣受過敏性哮喘症影響，令體重暴肥至70幾公斤，亦係佢人生最肥嘅時刻。

樊亦敏年輕時為體驗出埠參選1991年香港小姐，大眼睛和深邃五官令佢勇奪「最上鏡小姐」，但就輸畀冠軍郭藹明、亞軍周嘉玲、季軍蔡少芬；幸好最後簽約無綫入行。樊亦敏曾在香港電台節目《守下留情》透露18歲已發現自己患上隱性哮喘病，一直未停止服用類固醇，同時受免疫系統問題困擾；加入娛樂圈後，樊亦敏因壓力過大令病情不時發作，曾經試過每星期打過百支類固醇針入頭皮，加上食藥關係，脫髮問題嚴重至需戴假髮示人。樊亦敏亦曾因哮喘病而錯失一段婚姻，當時遇上穩定交往嘅對象，但基於對方係獨生子，樊亦敏認為對方需有下一代，但自己為避免將哮喘遺傳畀下一代，從小就決定唔生仔，於是忍痛離開對方。

久未拍攝《愛·回家》嘅樊亦敏日前完成內地工作返港，身形變瘦，不過就因意外造成左腳韌帶撕裂，佢就提到自己會於4月底回歸《愛·回家》，亦因為消瘦了30磅有多，已特登返公司度身；樊亦敏直言由去年5月開始瘦身，為咗健康着想，就搵咗營養師、戒走會過敏嘅奶類及糖、麩質，每日走路30分鐘左右。對於自己嘅病，樊亦敏亦指好少主動提及，認為人生就係咁有得亦有失。