頂替麥巴比？傳巴黎聖日耳門斟介盧卡古

joemalee · 發表於 2022-4-12 11:13:47

英超勁旅車路士前鋒盧卡古，上個夏天以高價由意甲國際米蘭回巢，不過今季表現平平，未受領隊杜曹重用。有傳法甲豪門巴黎聖日耳門有意簽入這名失意軍人，以頂替尾季可能離隊嘅基利安麥巴比。

盧卡古今季聯賽為車路士上陣20次，只係入得5球同交出1次助攻；最近依名比利時國腳，仲畀領隊杜曹打入冷宮，由夏維斯頂替佢擔任中鋒。據報盧卡古經理人柏斯托利奴，早前已經同PSG體育總監李安納度會面，並就轉會事宜進行談判，相信盧卡古下季好大機會再次離開「藍戰士」。

由於陣中球星基利安麥巴比遲遲未續新約，更盛傳將會加盟皇家馬德里，有指PSG已經做好準備，只要依名法國國腳離隊，就會簽入28歲嘅盧卡古頂替佢位置，不過盧卡古同「藍戰士」合約去到2026年夏天，轉會費相信唔會太平。另外車路士兩位會喺今夏完約嘅中場，包括佐真奴同尼高奴簡迪，目前亦分別受到祖雲達斯，以及皇家馬德里嘅注視，「藍戰士」下季人腳隨時大變。