阿布擬買土超球會　有前車路士球員壓陣

joemalee · 發表於 2022-3-25 11:08:02

因為受到英國政府制裁，車路士班主阿布拉莫域已宣布將球會出售，不過呢位俄羅斯富商對足球熱情不減，據報佢依家正洽購土耳其球會哥茲塔比，會談已經全部展開，呢支土超球隊入面更有一個前車路士球員，或者有機會再同阿布拉莫域重逢。

據土耳其媒體《Fanatik》報道，阿布拉莫域睇中土耳其老牌球會哥茲塔比，佢同球會現任班主施比爾已經展開洽談，施比爾早前已宣布因為球隊近期成績差勁，今季結束後將會離開，阿布拉莫域就有意接手，消息指雙方未來幾日會再度開會。

哥茲塔比有差唔多100年歷史，喺1950年曾拎過球會史上唯一一次頂級聯賽冠軍，不過今季就排聯賽尾3，好大機會降班收場。哥茲塔比依家陣中最出名球員，係32歲阿根廷前鋒迪山度，佢喺08/09球季登陸歐洲嘅第1站就係車路士。