葡萄牙冇佢更強？C朗被質疑入選資格

joemalee · 發表於 2022-3-23 11:52:40

為應付世盃外歐洲區附加賽，C朗近日再獲葡萄牙徵召。作為國家隊王牌球星，C朗一早已成為葡萄牙嘅標誌性人物，但呢位現年37歲嘅曼聯前鋒，近年表現難免有所下滑，有葡萄牙媒體近日就質疑C朗入選國家隊嘅資格。

C朗多年嚟作為葡萄牙主力，曾幫助國家隊捧起2016年歐國盃同2019年歐國聯冠軍，係名副其實嘅功勳主力。惟近年隨住佢年紀漸老，無論球會或國家隊嘅場上表現，亦變得愈嚟愈飄忽。葡萄牙媒體近日就指出，自2014年9月，葡萄牙喺C朗缺陣嘅情況下未輸過，包括曾喺歐國聯以4比1擊敗克羅地亞，認為葡萄牙冇咗C朗反而更強。

雖然對克羅地亞場波，被葡萄牙領隊費蘭度山度士形容為自己上任後，球隊踢得最好嘅一場比賽，但佢就唔同意葡萄牙媒體嘅講法，依然選擇力撐C朗：「我唔認為國家隊冇咗最佳球員，會踢得更好。」似乎未有計劃拋棄呢位葡萄牙當家球星。嚟緊世盃外歐洲區附加賽，葡萄牙有祖奧簡斯路停賽，仲有魯賓戴亞斯等多位主力因傷缺陣，葡萄牙想成功闖關，話唔定仲要靠C朗發圍。