駭人一幕！荷甲大戰火燒看台

joemalee · 發表於 2022-3-22 11:20:23

周日(20日)荷甲前列大戰出人駭人畫面，阿積士主場對飛燕諾嘅傳統大戰前，全場爆滿嘅主場看台突然起火，火勢蔓延極快，製造出大量火光同濃煙，而且起火位置同球迷非常接近，場面驚心。好在最後冇收到有人受傷消息，賽事亦照常舉行，阿積士3比2戲劇性贏波。

榜首阿積士主場迎戰第3位嘅飛燕諾，主場告魯夫球場有54,709人入場，未開波球迷已經非常興奮，一次大規模嘅放煙花儀式更發生罕見意外。據報有煙花燒着龍門後面看台嘅打氣Bannar，火勢一發不可收拾，當時所有球員已經落場準備開波，而火警位置同球迷非常接近，烈焰有4層樓咁高。現場出現大量黑煙，好在消防及時將火撲滅，事件中冇人受傷。

呢場比賽同樣緊張刺激，阿積士上半場落後1比2，去到78分鐘先由杜辛泰迪治追成平手，完場前4分鐘再由安東尼馬菲奧斯「絕殺」，戲劇性3比2反敗為勝。阿積士喺荷甲以66分排第1位，領先次席嘅燕豪芬2分，同第3位飛燕諾已拉開至11分。