上訴遭駁回　俄羅斯緣盡世界盃

joemalee · 發表於 2022-3-20 11:24:38

俄羅斯入侵烏克蘭後，國際足協(FIFA)及歐洲足協(UEFA)隨即禁止俄羅斯男女子國家隊及球會參加呢兩大組織主辦嘅賽事，包括即將舉行嘅世界盃外圍賽附加賽。雖然俄羅斯足總向國際體育仲裁法庭提出緊急上訴，但該法庭周五(18日)宣布駁回上訴，意味俄羅斯緣盡今屆世界盃。

根據原本附加賽賽程，俄羅斯將於3月24日晚對波蘭，但發生俄烏戰爭後，波蘭足總宣布拒絕同俄羅斯比賽，其後國際足協及歐洲足協亦禁止俄羅斯球隊參賽，並判波蘭直接晉身附加賽決賽。

俄羅斯足總不服，並向國際體育仲裁法庭提出緊急上訴，希望暫緩禁令，畀國家隊繼續參賽，但國際體育仲裁法庭決定駁回上訴，判辭話：「禁令仍然有效，俄羅斯國家隊及球會繼續被禁止參加國際足協主辦嘅所有賽事，法庭已成立專責小組，將繼續就此事作出裁決。」

由於俄羅斯無法參加外圍賽附加賽，意味一定冇份出戰今年11月喺卡塔爾舉行嘅世界盃決賽周。