幾乎頂甩C朗門牙　馬古尼造奧脫福最大歡呼

joemalee · 發表於 2022-3-17 11:32:28

曼聯今季成績令人失望，隊長哈利馬古尼更成為箭靶，大批粉絲都不滿蘭歷克堅持重用呢位經常犯錯嘅中堅。哈利馬古尼今場演出仍然唔多理想，曼聯所失1球佢有責任之外，助攻嗰陣更盲頭烏蠅幾乎頂爆C朗門牙！

曼聯上半場被攻入一球，馬體會組織過程中，哈利馬古尼突然脫離4人防線衝上去搶波，結果衝到一半，對方就睇準空位交波撕破曼聯防線，導致成條防線失位而失球。防守出錯之外，喺一次進攻角球期間，哈利馬古尼搶位嗰陣一頭頂中C朗塊面，痛到C朗即刻用手掩住個嘴，爭頂失敗後C朗仲用手按門牙，確保隻牙冇被撞甩。

今仗曼聯死氣沉沉，不過奧脫福全日最響亮嘅歡呼聲就係由哈利馬古尼炮製，84分鐘曼聯用桑馬達入替呢位隊長，全場球迷即刻報以熱烈歡呼，「馬體會只剩11人應戰」亦即時登上twitter全球熱門趨勢榜，認真諷刺。