車路士帶刀侍衞受傷　將缺陣4場大戰

joemalee · 發表於 2022-3-11 10:57:12

車路士上場英超以4比0大勝般尼，但亦付出沉重代價，該仗射入1球嘅右翼衞列斯占士受傷，經過詳細檢查之後，發現佢右腳腿筋受傷，預料需要休息2星期，將缺陣4場比賽。

列斯占士早前曾經因傷缺陣2個月，直至2月底先至復出，估唔到踢咗3場波後又受傷，幸好今次傷勢比較輕，預料抖2星期就可以復出，但仍然會缺陣車路士未來4場比賽，包括英超對諾域治、紐卡素、歐聯對里爾、英足盃對米杜士堡。

列斯占士喺社交網話：「保持耐性係關鍵，萬事皆有因，好快同你哋見面。」22歲嘅列斯占士以助攻力強見稱，今季為車路士喺各項賽事上陣26場，射入6球，佢養傷之下，領隊杜曹一定好頭痛。
另外，列斯占士亦唔會為英格蘭出戰3月底熱身賽對瑞士及科特迪瓦。