列斯聯唔等比爾沙續約？傳斟馬殊執教

joemalee · 發表於 2022-2-20 11:43:30

上季表現備受讚賞嘅列斯聯，今季成績大跌捲入降班漩渦，德高望重嘅領隊比爾沙亦開始受到質疑。據英國《每日郵報》報道，列斯聯對即將約滿嘅比爾沙續約採觀望態度，而且更製訂後備計劃，如果今夏同比爾沙「分手」，將力斟前RB萊比錫教練馬殊執教。

現年66歲嘅比爾沙同列斯聯以「逐年簽約」模式合作，依家已經進入合約最後半年，以往列斯聯成績突出，球會高層當然會耐心等待比爾沙答覆，不過列斯聯今季成績下滑，比爾沙嘅叫價能力亦隨之下跌，若續約拖延隨時分道揚鑣。

《每日郵報》消息指，列斯聯已將前RB萊比錫教練馬殊列為頭號目標，呢位美國教頭師承曼聯主帥蘭歷克，高壓逼搶同進攻踢法都比較接近比爾沙，而且佢上年12月被RB萊比錫炒魷後一直未有班落，如果列斯聯決定出手，馬殊將會樂意接受英超嘅挑戰。