PSG高層向球證施壓 皇馬2位主力次回合停賽

joemalee

皇馬喺歐聯16強首回合作客0比1不敵巴黎聖日耳門(PSG)之餘，仲損兵折將，2位主力卡斯米路、費蘭特文迪都攞黃牌，累積夠黃牌，次回合需要停賽，進一步打擊「銀河艦隊」晉級希望。

賽後皇馬教練安察洛堤非常不滿，怒插球證執法水平：「我哋有2位球員攞多1張黃牌，就要停賽，結果佢哋真係攞牌，我覺得呢2張黃牌都唔應該畀，根本係球證『贈送』，我哋陣容夠強大，佢哋亦唔係第一次停賽，我會搵到合適人選代替佢哋。」

預料次回合，費達歷高華維迪會代替卡斯米路嘅防中位置，老將馬些路踢費蘭特文迪嘅左閘位置。

西班牙傳媒指PSG會長艾卡理化、總監李安納度半場休息時，進入球證更衣室施壓，結果下半場費蘭特文迪食牌，其後PSG仲獲得12碼。

另外，根據統計，原本皇馬今場打和，晉級機會有96%，但輸波之後，晉級機會下降至58%，「銀河艦隊」曾經26次喺歐聯淘汰賽首回合作客輸波，有15次可以反勝晉級。

BB29

打擊晉級希望

LasCases

下場再鬥過