艾歷拜利「為國捐軀」　或遭曼聯放棄

joemalee · 發表於 2022-2-11 11:24:12

曼聯中堅艾歷拜利為科特迪瓦踢完非國盃之後，又再次受傷，紅魔鬼官方宣布呢位27歲後衞出現足踝腫脹問題，估計需要休息2星期。由於呢位「玻璃腳」近年抖多過踢，盛傳曼聯將於今季結束後放走佢。

艾歷拜利今季僅為曼聯上陣6次，已經多次傳出會方打算放棄佢，關注英超傷病組織「Premier Injuries」創辦人Ben Dinnery指艾歷拜利今次傷勢並唔嚴重，但問題係佢近年經常受傷，令曼聯管理層失去耐性：「曼聯中堅有哈利馬古尼、華拉尼、域陀連迪路夫，就算後備上陣優先次序，菲爾鍾斯都先過艾歷拜利，佢今次受傷後，仲會唔會再為曼聯上陣，實屬疑問。」

艾歷拜利同曼聯仲有1年半合約，據悉AC米蘭、羅馬等多支意甲球隊都有興趣簽佢，今夏離隊機會非常大。
另外，曼聯今夏有可能再買中堅，多蒙特2位守將薩加度、文路爾艾簡治都係紅魔鬼嘅收購目標。