前港姐冠軍張名雅入行10年昨宣佈離巢無綫

GIRLAV · 發表於 2022-2-9 10:22:01

過往都有唔少無綫藝人選擇離巢往外闖及專心照顧家庭，今年一月已經有王君馨及岑杏賢宣布離開TVB。去到噚日（6日），2012年港姐冠軍張名雅（Carat）亦喺社交網站宣布離巢。

張名雅喺IG宣布離開無綫：「眨吓眼，快十年了，入行的經過還歷歷在目。當時有個心態唸著試下啦，反正都大學畢業，亦從加拿大回港了。如果唔試就以後都唔會做呢件事㗎啦！於是媽咪提名我參選香港小姐。如果遲D生多個女，我就可以將我手上嘅冠亞季后冠都送比佢（香港小姐冠軍，溫哥華華裔小姐亞軍，國際中華小姐季軍）我是否選美達人？不，只是想做就做！以後可以做自己鍾意做嘅野，繼續同大家分享，見面。希望不久嘅將來有好消息同大家講最後要多謝公司上下幫過我嘅你地！兄弟姐妹，江湖見 #人生有幾多個十年 #想做就做 #newyear #newresolutions」

有唔少網民都認為2012年嘅港姐好高質，例如朱千雪、湯洛雯、林泳淘及陳潔玲等靚女參加，最終由張名雅爆冷跑出，獲得冠軍、「國際親善小姐」、「航空大使獎」以及「現場最受歡迎佳麗大獎」。張名雅加入無綫10年，星途發展平平，參演劇集唔多，主要都係飾演配角，例如「鬼同你OT」、「是咁的，法官閣下」、「換命真相」及「星空下的仁醫」等等。雖然佢事業發展麻麻，不過愛情發展順利，喺2016年下嫁律師蔡錦豪，其後誕下囝囝蔡浚鏗（Mario）及蔡俊軒（Milo），不時喺社交網站上載家庭照，一家四口幸福美滿。