愛火重燃不可收拾丁子朗「伸脷」肉搏咀到戴祖儀出血

GIRLAV · 發表於 2022-2-5 10:53:26

藝人丁子朗（丁丁）與戴祖儀那團愛火一發不可收拾，寬衣解帶激咀兼疑似伸脷，連日來成為網民熱話。丁丁坦言與祖儀太熟，不會咀出真感情，不過卻承認因當時太激烈，搞到祖儀嘴唇受傷！

丁丁與祖儀於《青春不要臉》內原本飾演一對，劇情交代男方事業有阻滯致分手收場，2人約定只要齊齊當上主角便復合。前晚終於輪到丁丁發威，成功躋身主角之列，對祖儀尚未心死的他「牛記笠記」急跑往會佳人，到祖儀家一刻雙方即慾火焚身，丁丁主動激咀祖儀，二人寬衣解帶「埋身肉搏」。

唔會過電

丁丁露出弗爆腹肌，脫剩「背心仔」的祖儀索性騎實他，最終雙雙撻落梳化溫馨纏綿，場面既浪漫又sweet。而2人的激戰相當踩界，更有指丁丁忘形咀到伸脷，截圖中亦疑見「脷」之所在，他受訪時說：「印象中係冇（伸脷）嘅，不過當時太投入演出，搞到祖儀個嘴流血。拍嘅時候都唔知畫面咁激，依家睇番先發現。（咀出真感情？）一定唔會，我哋識咗太耐嘞。（拍到好尷尬？）冇，慶幸自己遇到個好拍檔，呢場已經係全套劇最激㗎嘞！（嚟緊感情線順風順水？）又唔係喎，仲有好多風浪關余德丞事，大家記得追睇嘞。」

唔識尷尬

祖儀則說：「起初都覺得尷尬，始終未試過咁激烈嘅戲，不過一開始拍攝就知道要將啲心思放喺戲內，由門口到梳化都有一段距離，全程要配合鏡頭走位，所以後來都冇再諗尷唔尷尬嘞。」而昨午她出席新劇造型暨拜神儀式，順道幫丁丁澄清：「佢冇（伸脷），但撞爆我個嘴見紅，所以收視都一樣見紅。估唔到回響咁大，大到自己都唔發貼文。尋晚播出時啱啱開緊工，但都收到好多訊息，好彩唔係喺屋企同父母一齊睇。」