莫拉達飛抵馬德里　加盟巴塞好事近

joemalee · 發表於 2022-1-28 12:02:35

祖雲達斯前鋒艾華路莫拉達被傳媒影到，佢已經飛到西班牙馬德里，預料係商討轉投巴塞隆拿嘅問題，如無意外，有望今個月底冬季轉會窗關閉前，正式跳槽。

艾華路莫拉達2020年9月被馬體會外借去祖雲達斯，借用期將於今夏屆滿，祖記有權用3,000萬歐元買斷呢位29歲西班牙國腳，但呢支意甲勁旅無意咁做，因為佢哋傾向收購費倫天拿前鋒杜辛華荷域，反觀巴塞教練沙維非常欣賞艾華路莫拉達，加上隊內鋒線多傷兵，更加渴望今個月簽入佢。

不過，巴塞隆拿傾向借用艾華路莫拉達，而馬體會想將佢以3,000萬歐元直接出售，避免佢2023年6月約滿走人，導致人財兩失。如果兩間球會可以解決呢個分歧，相信可以立即完成轉會。