搞完一大輪　費倫托利斯終於成功註冊

joemalee · 發表於 2022-1-12 20:22:25

巴塞隆拿正式宣布早前由曼城來投嘅費倫托利斯，成功註冊成為正式球員，可以隨時候命，呢位21歲翼鋒將會着上阿古路退休之後留下嘅19號球衣。

巴塞隆拿上月尾落實以6,500萬歐元向曼城收購費倫托利斯，但因為球會總薪酬支出超過西甲上限，令佢一度未能註冊。幸好巴塞隆拿近日成功將高薪球星菲臘比古天奴外借去阿士東維拉，加上另一位高薪球員烏姆迪迪同意大幅減人工續約，終於騰出足夠薪酬空間畀費倫托利斯註冊。

費倫托利斯2020年夏天由華倫西亞加盟曼城，上季英超上陣24次入7球，但今季因為受傷，僅於英超上陣4次入2球。巴塞隆拿近期有多位球員受傷及確診新冠肺炎，導致陣容不整，費倫托利斯成功註冊，對球隊絕對係一場及時雨。

值得一提，同樣由曼城轉投巴塞隆拿嘅射手阿古路，因為心臟問題，早前已宣布掛靴，費倫托利斯正好接過呢位前曼城隊友嘅19號球衣，延續佢嘅足球夢。