基艾沙重傷提早收咧　無緣世盃外生死戰

joemalee · 發表於 2022-1-11 22:05:02

祖雲達斯上場意甲擊敗羅馬，但卻付出沉重代價，剛傷不久嘅翼鋒費達歷高基艾沙該仗又受傷，經過驗查後發現佢左腳膝部韌帶受傷，需要接受手術，預料將缺陣6個月，意味無緣為意大利國家隊出戰3月舉行嘅世界盃外圍賽附加賽。

24歲嘅費達歷高基艾沙近年成為祖雲達斯主力，並有份協助意大利奪得上年歐國盃冠軍，但呢位星二代今季飽受傷患困擾，曾因傷抖咗超過1個月，直至早前對拿玻里，先至復出，並射入1球，可惜上場對羅馬，踢到32分鐘就傷出，祖記官方宣布，基艾沙將於未來幾日內開刀。

意大利傳媒認為費達歷高基艾沙起碼需要抖6個月，肯定無法出戰3月25日凌晨世界盃外圍賽對北馬其頓，如果意大利晉級，就會遇上葡萄牙對土耳其嘅勝方，爭奪1張決賽周入場券，費達歷高基艾沙長抖之下，對於意大利及祖雲達斯都係沉重打擊。
另外，祖雲達斯亦宣布中場艾朗藍斯確診新冠肺炎，正在接受隔離。