塞內加爾雙星確診　文尼97分鐘入波致勝

joemalee · 發表於 2022-1-11 10:05:46

周一(10日)非國盃B組賽事，冠軍大熱塞內加爾首戰對津巴布韋踢得辛苦，靠沙迪奧文尼喺補時7分鐘射入爭議12碼，驚濤駭浪下贏1比0打響頭炮。同組嘅畿內亞亦以1比0擊敗馬拉維，周五(14日)晚塞內加爾將同畿內亞正面交鋒。

塞內加爾賽前爆出疫情問題，門將艾度亞文迪同中堅高列巴尼兩大球星確診缺陣，塞內加爾雖然控制大局，但面對津巴布韋嚴密防線亦束手無策，沙迪奧文尼連番進襲都被阻擋，呢位利物浦球星今場12次喺津巴布韋禁區內掂波，係自2017年有紀錄以嚟非國盃嘅最高紀錄。

比賽去到補時階段，津巴布韋後功馬桑維飛身阻擋射門被省中手部，雖然距離極近，但球證翻睇VAR後仍決定判罰12碼，結果沙迪奧文尼喺97分鐘射入全場唯一入球，帶領塞內加爾贏波。