36次攻門0入球！皇馬慘被卡迪斯悶和！

peecock · 發表於 2021-12-20 23:57:44

周一(20日)凌晨西甲上演超級攻防守，榜首皇家馬德里主場迎戰排尾2嘅卡迪斯，全場有82%控球率狂攻對手，但係36次攻門竟然顆粒無收，最終只能踢成0比0平手。皇馬依家領先次席西維爾6分，但係踢多1場。

皇馬受到新冠肺炎疫情影響，今場有莫迪歷、馬高阿辛斯奧等多人缺陣，但實力仍然比卡迪斯高幾班，但係賓施馬、夏薩特等攻擊手連番失機，全場36次攻門都入唔到波。數據顯示，過去10年歐洲5大聯賽超過2萬場賽事，只有4場出現過一隊攻門達36次或以上而入唔到波嘅賽事，對上一次係2019年阿特蘭大對安玻里嘅意甲，當時阿特蘭大有47次攻門但交出白卷。

皇馬教練安察洛堤賽後表示：「球員已經盡晒力，我哋仲可以做咩？呢啲情況偶然會發生，今場有好多正面嘅演出，唯一負面就係拎唔到3分。」皇馬球員盧卡斯華斯基斯亦表示：「我哋由頭到尾主導比賽，亦有唔少黃金機會，但足球有時就係你永遠冇辦法將個波送入網。」