夏薩特一個承諾　比利時乙組隊提出斟介？

joemalee · 發表於 2021-12-8 08:30:10

比利時天才球星夏薩特2年前加盟皇家馬德里後，因傷患同狀態困擾愈踢愈沉，今季只得4次喺西甲正選上陣，一直有傳佢將會被賣走。近日傳聞又出現新買家，不過唔係紐卡素或其他豪門，而係比利時乙組球會韋斯達路！

韋斯達路副會長辛迪卡亞喺球圈有一定影響力，曾經做過費倫巴治高層，同夏薩特更份屬好友，佢日前表示：「我喺夏薩特踢里爾嗰陣已經識佢，我哋係好朋友，佢曾經答應過(為咗我)會為費倫巴治效力，雖然依家要佢踢韋斯達路難度更高，但未來嘅事話唔埋，或者佢會想喺呢度收山。」